İxrac nəzarətinə düşən mallar üzrə Xüsusi icazə verilməsi

İxrac nəzarətinə düşən mallar (işlər, xidmətlər, əqli fəaliyyətin nəticələri) üzrə Xüsusi icazələrin verilməsi Azərbaycan Respublikasının Müdafiə Sənayesi Nazirliyi tərəfindən həyata keçirilir. Elektron informasiya sistemi fiziki və hüquqi şəxslərin xüsusi icazə alınması üçün müraciətlərini elektron qaydada təqdim etməsini və müraciətlərin aidiyyəti üzrə emalını təmin edir. İstifadəçilər elektron imza vasitəsilə sistemə daxil olur, şəxsi və əlaqə məlumatlarını qeyd edir, xarici iqtisadi əməliyyatın növünü seçir və seçilmiş əməliyyata uyğun tələb olunan sənədləri müraciətə əlavə edirlər. Sistem müraciət məktubu üçün şablonun yüklənməsinə, doldurulmuş sənədin müraciətə əlavə edilməsinə, müraciətin qaralama şəklində saxlanılmasına və elektron imza ilə imzalanaraq təqdim edilməsinə imkan yaradır. Təqdim edilmiş müraciətlər Nazirliyin əməkdaşları tərəfindən sistem üzərindən nəzərdən keçirilir və icra olunur. Müraciətin icra vəziyyəti, statusu və mərhələləri istifadəçilər tərəfindən izlənilə bilir. Müraciətin geri qaytarılması, icra edilməsi, imtina ilə nəticələnməsi və ya xüsusi icazənin verilməsi kimi hallar barədə müvafiq bildirişlər istifadəçinin elektron kabinetində əks olunur. Xüsusi icazə verildikdə müvafiq sənəd PDF formatında sistemə yüklənir və istifadəçi tərəfindən elektron kabinet vasitəsilə əldə edilə bilir. Sistem, həmçinin müraciətlərin və qaralamaların idarə edilməsi, bildirişlərin qəbulu və əks əlaqənin təmin edilməsi funksiyalarını əhatə edir.