AİSTGroup MMC 2011-ci ildə təsis edilmişdir. Şirkət, əsasən, İT və şəbəkə avadanlıqlarının quraşdırılması, idarəedilməsi və texniki dəstək xidməti, informasiya sistemlərinin və internet informasiya ehtiyatlarının istehsalı, e-xidmətlərin işlənib hazırlanması, eləcə də dövlət informasiya ehtiyatlarının inteqrasiyası sahələrində ixtisaslaşmışdır. 

Şirkət Azərbaycan Respublikasının İqtisadiyyat Nazirliyi, Azərbaycan Respublikasının Əmək və Əhalinin Sosial Müdafiəsi Nazirliyi, Azərbaycan Respublikasının Təhsil Nazirliyi, Azərbaycan Respublikasının Dövlət Sosial Müdafiə Fondu, Azərbaycan Respublikasının Qaçqınların və Məcburi Köçkünlərin İşləri Üzrə Dövlət Komitəsi, Azərbaycan Respublikasının Dövlət İmtahan Mərkəzi, Bakı Metropoliteni Qapalı Səhmdar Cəmiyyəti kimi dövlət qurumlarında bir sıra uğurlu layihələr həyata keçirmişdir.

Fərəhləndirici haldır ki, Əmək və Əhalinin Sosial Müdafiəsi Nazirliyində həyata keçirilmiş VEMTAS layihəsi ("Ünvanlı yardım" altsisistemi) Birləşmiş Millətlər Təşkilatı tərəfindən Cənub-Cənub Əməkdaşlığı çərçivəsində paylaşılması və digər Cənub ölkələrində də tətbiqi məqsədəuyğun olan müasir və səmərəli, şəffaf iş mexanizmləri kimi qəbul edilmişdir. Bu altsistem qabaqcıl təcrübə kimi BMT-nin "Ərəb ölkələri, Avropa və MDB regionlarında Cənub-Cənub Əməkdaşlığı çərçivəsində Əməkdaşlıq Mexanizmləri və Həllər" adlı portalında yerləşdirilmişdir. Eyni zamanda, Dünya Bankının ekspert qrupunun müraciəti nəzərə alınmaqla həmin təşkilatın Vaşinqton şəhərindəki (ABŞ) mərkəzi ofisi üçün VEMTAS-ın videokonfrans vasitəsilə geniş təqdimatı da keçirilmışdir.

Əmək və Əhalinin Sosial Müdafiə Nazirliyinin “Çağrı Mərkəzi vasitəsilə avtomatlaşdırılmış pensiya təyinatı” xidməti Beynəlxalq Sosial Təminat Assosiasiyasının (BSTA) Müsbət Təcrübə üzrə Fəxri Diplomuna (Certificate of Merit) layiq görülmüşdür. Azərbaycan Şərqi Avropa və Müstəqil Dövlətlər Birliyi məkanında Çağrı Mərkəzi vasitəsilə avtomatlaşdırılmış pensiya təyinatı həyata keçirən ilk ölkə olmuşdur.

Şirkətin başqa bir layihəsi – "Əmək müqaviləsi bildirişi üzrə elektron informasiya sistemi" informasiya-kommunikasiya texnologiyalarının tətbiqi sahəsində Azərbaycanın uğurlu təcrübəsi kimi BMT-nin ixtisaslaşdırılmış qurumu olan Beynəlxalq Telekommunikasiya İttifaqının (BTİ) “Çempion layihə” mükafatına layiq görülmüşdür. Bu mükafat 2017-ci ilin 13 iyun tarixində BTİ-nin Cenevrə şəhərində keçirilən “İnformasiya Cəmiyyəti üzrə Ümumdünya Sammiti 2017” tədbirində təşkilatın Baş Katibi tərəfindən təqdim olunmuşdur.  AİSTGroup MMC həmçinin bir sıra biznes qurumlar üçün çeşidli proqram məhsulları hazırlamışdır. Şirkət bir sıra məşhur aparıcı İT şirkətlərlə partnyorluq əlaqələrinə malikdir. AİSTGroup MMC “Fərdi məlumatların informasiya ehtiyatlarının  formalaşdırılması və   informasiya sistemlərinin yaradılması, onlara xidmət göstərilməsi fəaliyyətinə lisenziya"ya (müddətsiz) malik ilk şirkətdir.